Act 11 | BEF | STEP | Yutia kegi'afi to Galili kegi'a aposolo bona'i hiti to Yesutoga komopa'ani melete minanamagi ya hite fegutoga bona'magi ana hite Hu'mamofihi kaga'a libe lana'a keheli baga i'ahana yabe.

Acts 11

Yelusale hepato mono bona'i yaki'a huto hi'ahabe luto Pitau lu huto hu'ehina

1 Yutia kegi'afi to Galili kegi'a aposolo bona'i hiti to Yesutoga komopa'ani melete minanamagi ya hite fegutoga bona'magi ana hite Hu'mamofihi kaga'a libe lana'a keheli baga i'ahana yabe. 2 Pitau Yelusale tilago fegutoga bona'i enugufa laga huse'nalo amuya nemalana bo luga'amagi ka emeki'ahana. 3 Enali ma lite li'ahana: Enali enugufa'ani laga mehi'ahana fegutoga bona'magihi nonuga ti'ahatamo enali hiti nose'na ne'ahana. Henabe lutobe? 4 Ya lago Pitau asaga hu bulo molo'ehinamofihi hapa'alogati hapi fito tiloto ma luto lu hokolo huto lu epi'ehina:

5 Nani Yopa hepalugu nunumu nohunagati bamu'i mone ma huto bu go'ohube. Sipi sa nekisa'a loegi loegi ni'inalo naga'i gi hepi'ahanana kokulumaluguti limito nani nugufalo mino'ehibe. 6 Ananamofihi komopa'agu henana ni'ifi luto bu go bati hu'ohuna ana sagu yagakafa lumofihi lumofihi enigi loegi loegi ni'ina hiti osifa'ifi to lopi namafi babu lito ni'igo bu go'ohuna yabe. 7 Ya nohugo nogo moneuba ma luto lu nimi'ehina: Pitao, kai ho tito ma yagakafa enohoto nobo. 8 Ya noligo nani ma luto lu emi'ohuna: Sipi Bo, nani ya mehiluna'mu yabe. Ya'mana yagakafa kolo tana nose'na Hu'mau menalo luto lu laga hu'ehigo nani mo si'ohuna nose'na ni'ibe. 9 Ya lugo ana nogouba kokulumaluguti aku'i ma luto mone hiti lu nimi'ehina: Hu'mau nose'na nose'mofihi yabe luto molo'ehina kai aku'i mo sise nose'na yabe melubo. 10 Ya'ma nogouba loegi monegi yupahi ya luto lulago ana sipi sana kokulumalugu ti'ehina yabe. 11 Ana kana'asilo Sisaliati bo loegi monegi enoho lifigo anamagi nani kolata huna noho kasito heneti'ahana yabe. 12 Ya hago kekesa loe lae meyigito mana bo enemege'i bubo luto Sikalafu'uba lu nimi'ehina yabe. Ya hulago Sisaliati Hu'mamofitoga komopa'ani emite neminana bo luga'amagi hiti Koniliasihi nonuga moneka buto ti'ohuta yabe. 13 Ya hunogo koyapa'i Koniliasihi nonuga agelouba tiloto ma luto kaga mone ma luto lu emi'ehina: Kai koko panaka Yopa hepatoga enoho lifitogo bo mone'mofihi gi'a Simoni Pita yabe luto sa huto le'mete alabe. Yana agelomofihi kaga'a Koniliasiu lu nimi'ehina yabe. 14 Ai mono kaga lu lepilenogo ya'mana kagalo kaika hiti lalamehaka hiti kehelilete Hu'mamofitoga komopatini emilabe, agelouba ya luto lu emi'ehina. 15 To nani kaga hapi fito lu noepugo koyapa'i lalitoga huto hu'ehina suhi luto Sikalafu'uba enalitoga limi'ehina. 16 Ya higo koyapa'i Sipi Botiuba lu limi'ehina kagalo nekesa i hokolo hu'ehina yabe. Ai mana kaga ma luto ni'ina: Yoni nagami lafatu folo epolo'ehina, alihi lenali'i Sikalafutu folo epalalana'mu suhi lenalitoga limito minalibe. 17 Lali koyapa'i Sipi Boti Yesu Kilisitotoga komopati molo emi'ohunogo Hu'mau gelo bito Sikalafu'i limi'ehina ya'mana suhi huto fegutoga bona'i mone'amagi aitoga komopa'ani emi'ahago Hu'mau ana huto gelo bito Sikalafu'i epi'ehibe. Nani kiyi'afita nohuto'ni Hu'mamofihi kapo'a hekini lube? Ya luto Pitau lu epi'ehina yabe. 18 Ya ligo enali Pitahi bu fi kutu nehanana he'milete Hu'mamofitoga fokehi hete gelo bite ma lite li'ahana: Hu'mau fegutoga bona'magi komopa'ani i gelehe hulenogo enali hiti ana hite minoba minoba hilabe lite enegelo bi'ahana.

Yesuhi naga'i Atioki hepato ho tite lili'na li'ahana

19 Sitifenihi ho fili'ahana kana'aluga komopa'ani emito mine'ahana bona'magi enegene mane ite enahago enali tili tele hite fato fato hepato bi'ahana yabe. Luga'amagi Fonisia hepato foto'i nebago Saipalasi to Atioki hepatoga nebago hilete ka lamana'a Yuta bona'magisigo lu epi'ahana. 20 To Hu'mamofitoga komopa'ani melete minana bona'i Saipalasi bo hiti to Sailini bo hiti Atioki hepatoga bite Sipi Bo Yesuhi ka lamana'a fegutoga bona'i hiti enalitoga lu yege hete lu epi'ahana yabe. 21 Sipi Bomofihi amuya'a enalitoga minago babu bona'i luga'a ana kaga kehelite komopa'ani i gelehe hite Sipi Bomofihi mege'i mele'ahana yabe.

22 Ya'mana kagauba Yelusale hepato Yesuhi nehanalo henetigo analoti Banabasihi ho lifigo Atioki hepatoga bu'ehina yabe. 23 Banabasiu ana hepato buto henetiloto Hu'mamofihi boana'a bati hite nehago bu enogoloto gelo sipi biloto bati hite nehanagi ana suhi lite fulunaguti koguna ite asaga komopatini Sipi Bomofitoga emite mino mana hilo luto enogo'na bi'ehina yabe. 24 Banabasiu ai hetofa bo minoto komopa'a Hu'mamofitogago emito minago Sikalafu'uba aitoga bai tago mino'ehina. Ya higo babu boana'i komopa'ani i gelehe hite Sipi Bomofihi naga'a hiti ikelete moneka mine'ahana yabe.

25 To alihi Banabasiu Solihi sa sa huto Tasasi bu'ehina. 26 Ya huto Solihi bu goloto Atioki aku'i le'moto o'ehina. Ya hilete ana hepato kufu mone'a mino baga ite Yesuhi naga'a enele'mo nupa hite sipi luga'a ka mana'a enelepi'aha'ina yabe. Aposolo bomagi Atioki hepato yata'a yupahi Kilisiteni enigi li'ahana yabe.

27 Ya'mana kana'alo Yelusale hepatoti kaga lu yege holata bo Atioki limi'ahana yabe. 28 Ya hana bomagihi folagaha'anigu bo mone bu'ehina gi'a Agabasi. Ai Sikalafu'mofihi amuya'alo ho tiloto asaga melugu nose'na fenene hilinagi hepato hepato kau'na halana'mu yabe luto lu huto hu'ehina. Ya lu'ehinalo alihi Kolotiasiu kibina bo minana kana'alo ya'mana kau'na he'ahana yabe. 29 Ya hago aposolo bomagi Yesutoga komopa'ani emite minana enalalu'anigi Yutia kegi'a nehanamagihi enehe'malune lite kaga lu keheli'ahana. Ya hilete Yesutoga komopa'ani emite minanamagi efahi ga'i legete li nupa hilete guna ite luga'a enali'ani nemelete luga kegi'a enalitoga mele'ahana. 30 Ya hilete Banabasinogo Solinogo ana efa etimigo Atioki lite bite mono olopa bona'i epi'aha'ina yabe.